ചിമ്മാനക്കളി

ഉത്തരകേരളത്തില്‍ കണ്ണൂര്‍, കാസര്‍കോട് എന്നീ ജില്ലകളിലെ ഒരു വിനോദകലയാണ് ചിമ്മാനക്കളി. ‘കന്നല്‍ കളമ്പാട്ട്’ എന്ന ഗര്‍ഭബലി കര്‍മത്തോടനുബന്ധിച്ച് വീടുകളിലാണ് ചിമ്മാനക്കളി അവതരിപ്പിക്കുന്നത്. ചിമ്മാനം എന്ന പദത്തിന് നേരമ്പോക്ക്, സല്ലാപം എന്നീ അര്‍ഥങ്ങളാണുള്ളത്. പുലയവിഭാഗക്കാരാണ് ചിമ്മാനക്കളി നടത്തുന്നത്. ചിമ്മാനക്കളിയില്‍ പാട്ടിനൊപ്പം വിവിധ പൊറാട്ടുവേഷങ്ങളും കടന്നുവരുന്നു. മാവിലന്‍, മാവിലത്തി, ചോതിയാര്‍, മാപ്പിള എന്നിവയാണ് ഇതിലെ പ്രധാന വേഷങ്ങള്‍. തുടിയാണ് വാദ്യോപകരണം.