ന്യൂഡല്‍ഹി: പട്ടിണിപോലെ മറ്റൊരു അപമാനമില്ലെന്ന് രാഷ്ട്രപതി പ്രണബ് മുഖര്‍ജി അഭിപ്രായപ്പെട്ടു. ''സമൂഹത്തിന്റെ താഴേത്തട്ടില്‍ കഴിയുന്നവരെ ഉയര്‍ത്തിക്കൊണ്ടുവരണം. അതുവഴി ആധുനിക ഇന്ത്യയില്‍നിന്ന് ദാരിദ്ര്യം തുടച്ചുനീക്കണം''- രാഷ്ട്രപതിയായി സത്യപ്രതിജ്ഞചെയ്തശേഷം നടത്തിയ പ്രസംഗത്തില്‍ പ്രണബ് മുഖര്‍ജി പറഞ്ഞു.സമത്വങ്ങളില്‍ ഏറ്റവും പ്രധാനം സാമ്പത്തിക സമത്വമാണ്.
ഗാന്ധിജി ഉള്‍പ്പെടെയുള്ള നേതാക്കള്‍ ഇന്ത്യക്ക് സ്വാതന്ത്ര്യം നേടിത്തന്ന കാലത്തെ ദേശീയലക്ഷ്യം മുന്നോട്ട് കൊണ്ടുപോവേണ്ടതുണ്ട്. ദാരിദ്ര്യം തുടച്ചുനീക്കുക എന്നതാണ് ആ ലക്ഷ്യം- പ്രണബ് പറഞ്ഞു. സമാധാനമാണ് വളര്‍ച്ചയുടെ പ്രധാനഘടകം. പക്ഷേ, ഇതിന് ഭംഗം വരുത്തുന്ന ഘടകങ്ങള്‍ നിലവിലുണ്ട്. നാം ഇന്ന് ശീതയുദ്ധാനന്തരമുള്ള നാലാം ലോക മഹായുദ്ധത്തിന്റെ നടുവിലാണ്. തീവ്രവാദത്തിന് എതിരായ യുദ്ധമാണിത്. തീവ്രവാദത്തിന്റെ ഭീഷണി മറ്റുള്ളവര്‍ തിരിച്ചറിയുംമുമ്പുതന്നെ ഇന്ത്യ ഈ യുദ്ധത്തിന്റെ മുന്നണിയിലുണ്ട്.
സമാധാനത്തിന്റെ കുറച്ചുനിമിഷങ്ങള്‍ക്ക് വര്‍ഷങ്ങളിലെ യുദ്ധത്തെക്കാള്‍ നേട്ടമുണ്ടാക്കാന്‍ കഴിയും. പരസ്പരദ്വേഷവും അക്രമവും വളര്‍ത്തുന്നവര്‍ ഇത് തിരിച്ചറിയണം- രാഷ്ട്രപതി പറഞ്ഞു. രാജ്യത്തിന്റെ ഭരണഘടന ഉയര്‍ത്തിപ്പിടിക്കുകയും എല്ലാഅര്‍ഥത്തിലും അതിന്റെ അന്തസ്സത്ത കാത്തുസൂക്ഷിക്കുകയും ചെയ്യും-പ്രണബ് പറഞ്ഞു.
ഇന്ത്യയുടെ ഉയര്‍ച്ച ബലത്തിലോ നശീകരണത്തിലോ അധിഷ്ഠിതമല്ല. മറിച്ച് മനശ്ശക്തിയാണ് അതിന്റെ അടിസ്ഥാനം. സമാധാനവും സ്‌നേഹവും കൊണ്ടാണത് സാധ്യമാക്കുന്നത്. നന്മയുടെ എല്ലാശക്തികളെയും ഒരുമിച്ച് കൊണ്ടുവരണം -സ്വാമി വിവേകാനന്ദന്റെ വാക്കുകള്‍ ഉദ്ധരിച്ച് രാഷ്ട്രപതി പറഞ്ഞു.
No comments:
Post a Comment